Sorkar laipuiin Nehru Memorial Museum hming a thlak ta

BJP kaihhruai sorkar laipui chuan New Delhi-a Nehru Memorial Museum and Library (NMML) tih chu official-in Prime Ministers’ Museum and Library (PMML) Society tiin a hming a thlak ta.

Nehru Memorial Museum hming thlak chungchangah Congress party chuan sorkar laipui chu na takin an bei zui. Party general secretary Jairam Ramesh chuan, 'Kan institution ropui leh khawvel pawha hriat hlawh, Nehru Memorial Museum and Library (NMML) chu PMML—Prime Ministers’ Memorial Museum and Library tihin sawi a ni ta. Kan Prime Minister hmasa ber leh ni rei thei ber chunga Modi thiltih hian mi tam takah hlauthawnna, ngaihṭhat lohna a thlen a ni," tiin a sawi. Modi chu Nehru leh Nehru-a kaihhnawih thilte tihchhiat tumna agenda kalpuiah a puh bawk.

BJP MP Ravi Shankar Prasad chuan Ramesh hi chhangin, Congress party leh Jairam Ramesh leh PM Narendra Modi-te chuan thlir dan inang lo tak an nei a ni tiin, Congress chuan Nehru leh a chhungkua ringawt an ngaihtuah laiin, Modi chuan India rama PM zawng zawngte a ngaihtuah a ni, a ti ve thung.

Congress hruaitu Sandeep Dikshit chuan hming thlak ringawt hian engmah a ti danglam lo a, an rilru puthmang a tilang zawk a ni, a ti. Sorkar laipui chuan a duh nih chuan PM dang hmin pawhin institution a din leh thei reng a ni tiin, mi tu emaw nuaibo leh rahbeh tumna hi India ram chanchin ropui rahbeh tumna a ni, a ti.

Shiv Sena (UBT) leader Sanjay Raut pawhin Nehru Memorial hming thlak chu sawiselin, 'Eng dang nge an la tih leh dawn? A building hming chu in thlak a ni thei, mahse India chanchina Pandit Nehru hming chu in thlak thei lo ang. Mahatma Gandhi, Pandit Nehru, Netaji Subhas Chandra Bose, Savarkar-te thil lo tih tawhte chu in thlak danglam thei dawn lo," tiin a sawi.

Congress hruaitu dang, Shashi Tharoor chuan Prime Minister dangte huam tel tir a nih dawn avanga India ram Prime Minister hmasa ber hming paihbo chu chhuanlam dawrawm tak a ni a ti a, Rahul Gandhi pawhin Nehru chu a hming vang ni loin, a hnathawh avanga hriatzui hlawh a ni, a ti ve bawk.

Kumin June thla laihawl vela defence minister Rajnath Singh kaihhruaia Memorial Museum and Library Society special meeting chuan Nehru Memorial Museum hming thlak hi a lo rel tawh a ni. August 14 aṭang khan official-in a hming hi thlak a ni ta a ni.

Prime Ministers’ Museum and Library Society tia thlak tak, Nehru Memorial Museum and Library hi kum 1964-a India PM hmasa ber, Jawaharlal Nehru a thih hnuah Indian Ministry of Culture-in a din niin, autonomous institution a ni. Library hi modern leh contemporary India research tite tan a ṭangkaiin, he hmunah hian Nehru sulhnu leh hnathawh hrang hrangte hmuh tur a awm a, ani bakah Mahatma Gandhi thuziak, Swami Sahajanand Saraswati, C. Rajagopalachari, B. C. Roy, Jayaprakash Narayan, Charan Singh, Sarojini Naidu leh Rajkumari Amrit Kaur-te thuziakte pawh a awm bawk. Social sciences lamah pawh Delhi-a library ṭha ber zingah a tel a ni.