Union cabinet-in e-bus scheme a pawm

Union cabinet chuan Nilaini khan mi nuai 3-40 chin chenna, khawpui lian 100-a electric bus 10,000 service tirna tur, 'PMe-Bus Sewa' scheme siam a pawm.

He scheme hi 2021-2022 budget speech-ah khan sawilan ni tawhin, sum ruahman hi Rs vbc 57,613 a ni. Sorkar laipuiin Rs vbc 20,000 a tum dawn a, a bak chu scheme kalpuina tur state-ten an tum ang.

Union minister Anurag Thakur chuan he scheme hi public private partnership (PPP) mode hmanga kalpui a nih tur thu leh, bus service tirte hi kum 10 chhung vil zui an nih tur thu a sawi. Scheme kalpuina tur khawpui 100 te hi competition hmanga thlanchhuah a ni dawn tih sawiin, he competition tel thei hi khawpui 169 an awm. Hetih lai hian Delhi, Mumbai, Surat leh Kolkalta-ah chuan mihring cheng maktaduai 40 chuang an awm avangin he scheme hian a huam ve thei dawn lo thung.