CWC-in FloodWatch mobile application tlangzarh

Central Water Commission (CWC)-in smartphone-a hman theih, ni sarih chhung atana tui len theih dan dinhmun thlir lawk thei, mobile application , 'FloodWatch' an siam chu Ningani khan CWC chairman Kushvinder Vohra chuan a tlangzarh.

He application hmangtute chuan ram chhunga tuilian dinhmun zawng zawng an hriat theih dawn bakah, an inven theihna atan tuilen theihna hmun leh tuilenna hnaivaia an awm leh awm lohte a hrilh thei dawn a ni. Hetih lai hian he application hian tuilian tur hrilh lawk tur hian tui lian vilna (flood monitoring point) hmun 1543 aṭanga point 328 chin ami chauh a la vil thei rih dawn a, kumtin kumtawp lamah chuan flood monitoring point tam thei ang ber dahluh hman an tum dawn tih sorkar laipuia ex-offico secretary chuan a sawi.

India-ah hian lui 400 chuang leh lui lian kan tih pasarih awmin, heng lui thui zawng hi km nuai 2 chuang an ni. Heng lui hrang hrang viltu, flood monitoring point-te hi an awmna hmun a hniam ṭhin em avangin thil thlen dan dik tak hriattir a harsa ṭhin nia sawi a ni. Official chuan Delhi-a Yamuna lui lian kha entirna ṭha tak a ni tih sawiin, lui chim chin khan meter 208.26 a thleng a, kha kha kum 45 chhunga a san ber ṭum a ni. Yamuna lui liana chhiatna thleng tam zawk kha chu inrin lawk theih thil ni mah se tuilian vilna awmnain a zir loh avangin, chhiatna a thlen phah a ni, a ti

Vohra chuan app an tlangzarh thar, 'FloodWatch' hmang hian tun hmaa harsatna an neih hrang hrangte kha sutkian theih an beisei thu a sawi. Ram chhunga tuilian tur hrilh lawkna kawnga an hmanraw ṭangkai ber a nih tur thu leh, satellite data, mathematical modelling-te a hman dawn avangin a rintlak tur thu a sawi.