HP-ah ruah sur vanga chhiatna thlengah mi 74 thi tawh

Himachal Pradesh-a fur ruah tui tla nasa avanga chhiatna hrang hrang thlenga thi chu mi 74 an tling tawh.

Ni 55 chhungin state chhung hmun hrang hrangah leimin 113 a thleng a, heng chhiatna thleng vang hian Public Works Department (PWD) leh National Highway Authority of India (NHAI) te chuan Rs. vbc 2,491 leh Rs. vbc 1,000 chuang ve ve hu an chan tawh a ni.

Shimla summer hill-a leimin chuan rel kawng a lak tel avangin rel tlan tihtawp a ni bawk.

Chief minister Sukhvinder Singh Sukhu chuan leiminin a tihchhiat thil tam tak siam ṭha leh tur chuan tlang din ang vela har a nih tur thu a sawi. Mi thiamte sawi danin leimin tam zawk hi Himalaya ecology dawrawm taka ruahmanna ṭha tawk loa building sak leh, ramngaw tihchereu bakah, tui luanna dal theia siam thil chi hrang hrang vang a nih thu an sawi.

Himachal Pradesh-ah hian Pathianni aṭang khan chawl loin ni thum chhung ruah nasa takin a sur a, Nilaini aṭang khan a ziaawm chho ta chauh a ni. Tun fur chhoa ruah sur nasa avang hian Rs. vbc 10,000 man hu an chan tawh tih hian an tawrhna leh channa tak tak a sawi fiah zo tawk lo niin official-te chuan an sawi. An state sum thawh chhuah tam zawk innghahna, Apple thawn chhuah leh tourism lam chu tun dinhmunah hian engmah an kalpui thei lo. Tun hmaa ni khata Rs. 2,000/- hlawh ṭhin taxi driver khan tunah chuan Rs. 2,00/- chauh an hlawh tawh a ni. Khualzinte chawlhna ṭhin hotel leh guest house-te pawh tun hmaa room zawng zawng khat ṭep reng ṭhin kha tunah chuan room tam zawk a ruak tawh rih bawk.