Indian artist dam lai zingah Anish Kapoor hlawhtling ber

Hurun Research Institute chuan Ningani khan ram chhunga artist la dam lai zinga hlawhtling zual 50; India Art List 2023 tichhuakin, hei hian artist la dam lai zinga July 31, 2023 thlenga an art (hnathawh) hralh ṭha leh hlawh hnemte a huam.

India Art list 2023-ah hian kum khata Rs. vbc 91 la lut thei Anish Kapoor chu pakhatna niin, hlum hmanga milem siam ṭhin a ni. British-Indian Anish Kapoor hian kum nga chhung a zawnin pakhatna dinhmun hi a hauh tawh. A thil siam tawh zinga to ber chu Rs. vbc 9.27 man zet a ni.

Anish Kapoor dawtah hian Arpita Singh awmin, ani hian Rs. vbc 24.71 a la lut ve thung a, a art zinga to ber chu Rs. vbc 11.32 a ni. Pathumnaah hian Jogen Chowdhury awmin, he lem ziak thiam hian Rs. vbc 19.76 a la lut bawk. A art zinga ngaihhlut leh to ber chu Rs. vbc 4.40 a ni. Lem ziak thiam tho, Vododara khaw chhuak, Gulam Mohammed Sheikh chu palinaah awmin, Sheikh hian Rs. vbc 17.88 a la lut a, top 10-a lang ve dangte aiin Sheikh hian art mal pakhat man hlut zawngah a ber a hauh a, a lem ziah man to ber chu Rs. vbc 16.89 a tling.

Kum 98 mi Krishen Khan chuan pangana dinhmun luahin paruknaah hian Sakti Burman a awm. Top 10-a lang zingah hian kum 26 mi, Raghav Babbar chu naupang ber niin, pasarihnaah a awm a ni. Visual artist Rameshwar Baroot, contemporary painter, Anju Dodiya leh Delhi-a lem ziak thiam, Subodh Gupta-te chu Top 10-ah hian an lang ve bawk.