Parliamentary panel-in Criminal law bill thar 3 ennawn dawn

Lok Sabha monsoon session neih zawh taka Indian Penal Code, 1860, the Criminal Procedure Code, 1898 leh the Indian Evidence Act, 1872 te thlakna atan arawtna The Bharatiya Nyaya Sanhita Bill, 2023, Bharatiya Nagarik Suraksha Sanhita Bill, 2023, leh Bharatiya Sakshya Bill, 2023 tih rawtna pawm chu Standing Committee on Home Affairs chuan August 24-26 chhung hian an ennawn dawn.

Parliamentary Standing Committee on Home Affairs hi Rajya Sabha hnuaia awm a ni a, Lok Sabha aṭang pawhin member an awm a ni. Member zingah hian Adhir Ranjan Chowdhury, DMK MP Dayanidhi Maran te, Dilip Gosh te, TMC MP Derek O Brien te, Digvijaya Singh te, NR. Elango te, Rakesh Sinha leh a dangte an tel. Congress MP, Adhir Ranjan Chowdhury chu member ni mah se, Lok Sabha aṭanga suspend a nih avangin ennawnnaah hian a tel thei dawn lo a ni. Standing Committe hi Rajya Sabha-a BJP MP, Brijlal kaihhruai a ni a, inrawn khawmna leh bill chungchanga report pe turin thla thum chhung hun pek an ni.

Member zinga eptu MP pakhat chuan eptute chuan bill ennawn a nih hunah an thil duh an sawi tur thu leh, inrawn khawmna hun tam zawk an dil tur thu a sawi. Heng criminal law thlaka siam ṭhatna tur bill put luh a nih hian inbiakna mumal a awm loh thu sawiin,"Heng dante hi kum 100 chuanga upa an ni a, thawklehkhata thlak thut tur hian inrawn khawmna mumal tak a awm a ngai a ni," a ti.

Congress chuan he bill chungchangah hian mi tam zawk ngaihdan lak a ṭul ni-a an hriat laiin Tamil Nadu-a sorkar lai, DMK chuan dan thar hming atana Hindi hman chu an dodal thu an sawi thung. Bill put luh a nih lai hian bill pu luttu Amit Shah chuan India rama misual hremna kalphung thlak a nih tur thu leh, tunlai khawvel mil leh rang zawka rorelna thlen a nih theihna atana ruahman a nih thu a sawi a ni.