Google Pay laka PIL theh luh HC-in hnawl

Dan zawm lo leh mimal information him loa hriatna avanga Google Pay laka Public Interest Litigation (PIL) pahnih theh luh chu Delhi High Court-in a hnawl.

PIL hi Chief Justice Satish Chandra Sharma ṭhutna bench-in ngaihtuahin, Google Pay chu mipui mamawh siamtu, third party application chauh a ni a, RBI hnuaia Payments and Settlement Systems Act (PSS Act) -in a huam ve loh avangin PIL hi pawm theih a ni lo, a ti.

PIL theh luttu zinga pakhat, Abhijit Mishra chuan GPay chu phalna nei loa Aadhar data phutah a puh a, PSS Act hnuaia a awm loh thu leh India ram chhunga pawisa inpekna atana hman theih tura statutory regulations paltlang lo a ni, a ti. PIL dangah hian Google Pay chu khuahkhirhna awm loa a hmangtute information, PAN card leh Aadhar bakah, an pawisa chet vel dan neia hre vekah puh a ni bawk.

Court hian a hmain Gpay chu PSS Act hnuaia dan anga awm a nih loh thu a lo sawi tawh a, mahse, tun ṭuma a thutluknaah hian PIL theh luttute'n Google Pay-in mimal information neia khawih vek theia an puhna erawh ṭan chhan awm lo niin a sawi.

"Tun dinhmunah National Payment Corporation of India (NPCI) hi India ram chhunga UPI hmanga pawisa che vel viltu a ni a, RBI hnuaia PSS Act hriatpuiin pawisa inpekna kawng dang pawh an kalpui thei a ni. Google Pay UPI aṭanga pawisa che vel erawh mi pahnih inkar emaw, mi pakhat leh sumdawng inkarah chauh hman a ni a, hei hi PSS Act, 2007 hnuaia sum che vel vil leh enkawltu a ni lo tihna a ni," tiin PIL ngaihtuahtu zinga mi Justice Subramonium Prasad chuan a sawi. Court thutlukna tarlan a nih danin,"Third party app kan tih, Google Pay angah hi chuan bank-te tana customer tam zawk hui hi an tum a ni. NPCI hnuaiah UPI platform-a kalpui thei tura phalna nei an ni," tih a ni.