Rajiv Gandhi pian chamah amah hriatrengna hun hmang

Congress Parliamentary Party (CPP) chairperson, Sonia Gandhi chuan prime minister hlui Rajiv Gandhi pian cham vawi 79-na hriatrengna atan leh zahna chibai bukna atan, nimin khan New Delhi-a Veer Bhumi hmunah pangpar a dah.

Sonia Gandhi bakah Congress General Secretary, Priyanka Gandhi Vadra leh Robert Vadra, Congress President, Mallikarjun Kharge-te chu Veer Bhumi-ah an kal ve bawk.

Ladakh-a cham mek, Rahul Gandhi pawhin Prime Minister hlui leh a pa ni bawk, Rajiv Gandhi pian chamah hian X-ah post-in,"Ka pa, India tana i beisei ṭhinte kha he ka hriatrengnaah che hian hmuh theihin a awm a ni. Indian zawng zawngte beihna leh beiseite, kan nu India thu ngaichang chung zelin I kawngzawh kha ka rawn zui a ni," tiin a tarlang. Rajiv Gandhi pian cham vawi 79-na pual hian Pangong lake-ah a huhoa ṭawngṭaina hman a ni . Rahul Gandhi pawhin Pangong Lake-ah a pa pian cham a hman tur thu hi a sawi tawh a, Pangong lake a pan lai hian Instagram-ah a pain khawvela hmun mawi ber a ni a tih thu a post bawk.

Rajiv Gandhi hian a nu,Indira Gandhi thah a nih hnuah kum 1984 khan Congress hruaitu leh Prime Minister hna a chelh chhunzawm a ni. August 20, 1944-a piang a ni a, kum 40 mi niin India Prime Minister ni thei naupang ber a ni ta a ni. Prime Minister dinhmun December 2, 1989 thleng a chelh. May 21, 1991 khan Tamil Nadu-a Sriperumbudur hmuna election rally an neihnaa Liberation Tigers of Tamil Eelam (LTTE) mi leh sa pakhatin thihchilh bomb a tihpuahah a thi a ni.