Congress-in Working Committee siam ṭha

Congress party president Mallikarjun Kharge chuan Rajiv Gandhi pian cham, August 20 khan Congress Working Committee (CWC) an siam ṭhat thu a sawi.

Kharge hi February 24-a Raipur-a plenary session neihah khan CWC member ruat belh phalna hi pek a ni tawh a, mahse, thla ruk hnuah CWC siam ṭhatna hi an puang ta chauh a ni.

Working committee siam ṭhatah hian Lok Sabha member Shashi Tharoor leh Rajasthan-a Congress hruaitu, Sachin Pilot te chu tel belh an ni. Parliamentary Party chairperson Sonia Gandhi leh Rahul Gandhi te chu party President hlui an nih avangin CWC-ah hian member anga ngaih an ni nghal a, anni ang bawk hian Mammohan Singh leh Priyanka Gandhi Vadra te pawh CWC member an ni sa bawk.

CWC member 24 ni ṭhin chu 39-ah tihpun a ni. Member nghet 18 awmin, in-charge 14 ruat an ni a, sawm bik leh pawl hmalaknaa sulsutu mi pakua an awm bawk a ni. Member ruat thar zingah hian Finance Minister hlui, P. Chidambaram bakah, Maharashtra CM hlui Ashok Chavan, Madhya Pradesh CM hlui Digvijaya Singh, Lok Sabha Speaker hlui Meira Kumar, Punjab CM hlui Charanjit Singh Channi, LS member hlui Deepa Dasmunshi, LS member ni mek Gaurav Gogoi leh RS member ni mek, Syed Naseer Hussain te an tel.

Lok Sabha member Manish Tewari leh Kerala-a senior leader Ramesh Chennithala, sorkar hnathawk aṭanga politics-a zuang lut, K Raju bakah, Kodikunil Suresh leh Priniti Shinde te chu CWC member nghet ni tura ruat an ni bawk. Congress hruaitu naupang deuh zingah Alka Lamba, Supriya Shrinate leh Pawan Khera te chu sawm bik zingah telh an ni bawk a, Kanhaiya Kumar chu CWC-a students wing in-charge tura ruat a ni bawk a ni.