Karnataka sorkarin August 23-ah all party meeting a ko

Karnataka sorkarin Cauvery lui khuah sah a, an ṭhenawm state, Tamil Nadu hnena tui a pek avangin Congress sorkar chu Janata Dal (Secular) leh BJP te chuan na takin an bei a, he thil chungchanga harsatna an tawhte ching fel turin Karnataka sorkar chuan August 23-ah all party meeting a ko tih an puang.

Cauvery Water Management Authority chuan Karnataka sorkar hnenah hian ni 15 chhung chu ni tin cusecs 10,000 hu tui sah ṭhin turin a hriattir a, CWMA thurawn zawm hian Karnataka sorkar chuan Cauvery-a an tui khuah hi an sah ṭhin a ni.

Eptute chuan sorkarin Cauvery lui tui khuah a sah hi Tamil Nadu-a I.N.D.I.A hnuaia an thawhpui, DMK-te puihna tur atana a tih niin an puh.

Karnataka Deputy Chief Minister, Water Resources port-folio chelhtu ni bawk, DK. Shivakumar chuan all-party meeting koh a nih thu hi sawiin,,"Cauvery leh Mahadayi Inter-state lui buaina chungchang sawi turin all party meeting hi kan ko a ni.Chief minister Siddaramaiah chuan meeting hi Vidhan Soudha-ah min ho dawn a ni. Parliament-a member ṭhenkhat kan sawm bawk a, he thil kaihhnawiha harsatna dangte pawh kan sawi tel ang". a ti. Shivakumar chuan Karnataka-a ruah sur ṭhat loh avanga loneitute harsatna tawh chu a manganthlak thu a sawi a, an state leh a chhunga chengte dinhmun ngaihtuaha hmalak chu an hna a nih thu a sawi bawk. Lui sah tura Cauvery Water Management Authority lamin hriattirna an pek pawh ngaihtuah ṭha leh tura an ngen tawh thu a sawi.