Sorkar laipuiin HP ṭanpuina tur Rs. vbc 200 a pawm

Ruah sur nasa avanga chhiatna nasa tak thlenna, Himachal Pradesh ṭanpuina turin sorkar laipui chuan National Disaster Response Force (NDRF) kaltlanga Rs. vbc 200 pekna tur a pawm.

Ministry of Home Affairs (MHA) chuan, "Sorkar laipui chuan Himachal Pradesh dinhmun hi a thlithlai reng a, harsatna an tawhte an chinfel theihna tur atan bungrua bakah sum leh paia ṭanpuina pawh a pe reng a ni. Vawiin thlengin NDRF team 20, Indian Army column kua (9) leh Indian Air Force helicopter team thum (3) te chu chhawmdawlna leh chhanchhuahna hna thawk tura tirh an ni tawh," a ti. Sorkar laipui hian memorandum pawh nghak loin Himachal Pradesh sorkarin chhanchhuahna hnathawh a kalpui dan a hmuna en a, thlithlai tur hian July 19-21 chhung khan inter-ministerial central team an tir tih a tarlang bawk.

Hetih lai hian Himachal Pradesh chief minister Sukhvinder Singh Sukhu chuan tuna sorkar laipuiin ṭanpuina a pek dan chu a chawp zel a nih avangin an state-a chhiatna chi hrang hrang siam ṭhat leh tuamhlawmna tur atan a beitham a tih thu a sawi. An state-a chhiatna dinhmun leh an state awm dan uluk taka thlir chunga, awmze nei zawka ṭanpuina ruahman a, siam turin sorkar laipui chu a ngen.

Himachal Pradesh sorkar hian ruah sur kaihhnawiha chhiatna thleng hrang hrangte report buatsaih a,tuikhuah (dam) siamtute inthlahdah avanga chhiatna thlen dan pawh chhui chian a tum. Thuneitu zingah mawhphurtu an awm a nih pawhin an chungah hremna lekkawh a ni bawk ang. Himachal Pradesh-a tuikhuah hman mek 23 zinga 21 chu Central Water Commission-in a sak dan dik leh him nia a duante an zawm lo nia hriat a ni.