Covid chungchangah sorkar laipuiin high-level meeting ko

Khawvel hmun dangah coronavirus chi thar hmuh chhuah a nih avangin sorkar laipui chuan Thawhṭanni khan high-level meeting a ko.

Meeting-ah hian state tinte chu Covid positive-te sample aṭanga genome sequencing an buaipui mek zo vat tur leh, khawvel hmun danga Covid chi thar chu ngaihven reng turin a chah.

Prime Minister Principal Secretary, Dr. PK Mishra chuan Covid chi thar chungchang an sawiho zawh hian ram chhunga Covid hri leng dinhmun chu ṭha rihin, inenkawlna pawh inpeih vek mah se, state tinte chuan Influenza leh Severe Acute Respiratory Infection (SARI) anga natna langte chu vil uluk zual tura a duh thu a sawi.

Health Secretary, Sudhansh Pant pawhin khawvel puma Covid-19 dinhmun bakah, SARS-CoV-2 ang tak, BA.2.86 (Pirola) leh EG.5 (Eris) te chu a chi thar an nih thu a sawi a, World Health Organisation (WHO) report-a a lan danin heng Covid chi thar pahnihte hi ram 54-ah hmuh a nih tawh thu a sawi bawk.

Ni sarih liam ta chhungin khawvel pumah Covid-19 hri kai thar hi mi 2,96,219 an awm a, heng zinga mi 223 (hri kai thar aṭanga 0.075%) hi India rama mi an ni.