Delhi-ah ṭawngṭaina hman laiin Biak In beih a ni

Hindu pawl inti ṭhenkhat pung khawmin Pathianni khan Delhi-ah Kristiante Biak In an bei.

Pung khawmte hian Biak In hi suasamin, tual zawlah hian an aurual chhunzawm bawk. Biak In beih a nih hian ṭawngṭaina hun an hman lai a ni a, mi pakhatin hliam tenau a tuar a, complaint theh luh a nih hnuah thubuai kaihhnawihah hian police-te chuan mi pakhat an man tawh thu an sawi.

Biak In suasamtu zinga tel Hindu pawl pakhat chuan, Tahirpur, North East Delhi-a awm, Siyyon Prathna Bhawan chu ṭawngṭaina hun lem hmangah puhin, Hindu sakhua sawi chhiatna atan hun an hmang ṭhin niin a sawi. Video darh aṭanga a lan danin Biak In chhunga bungruate chu an paih darh nasa hle a, rimawi tumna hmanrua chi hrang hrangte pawh ṭawngṭaina room chhuatah an paih chhe hlawm a ni.

He Biak Ina lawi member-te chuan police station hnai ber, GTB Enclave-ah complaint theh lut turin an kal a, hetah pawh hian mipui eng emaw zat pung khawmin an lo au khum thu an sawi. An Biak In suasamtute hi Vishva Hindu Parishad leh Bajrang Dal mi leh sate nia an hriat thu an sawi bawk.

He buaina chungchangah hian thubuai ziah luh a ni a, Biak In chhehvela CCTV hmangin a bul tumtute man tumin an zawng mek niin an sawi. Police-te chuan pawl lehlam te ve ve complaint aṭanga thubuai an ziah luh thu leh, chak taka an chhui zui mek thu an sawi. Venthawn thilah Biak In veng tur hi an dah zui bawk a ni.