Nitin Gadkari-a'n Bharat NCAP a tlangzarh

Kawngpui hmangtute himna tur leh kawngpui him zawk neihna tur atan, motor ton 3.5 leh a aia ritte himna siam belh tura hmalakna; Bharat New Car Assessment Programme (NCAP) chu union ministry of road transport and highways, Nitin Gadkari chuan nimin khan a tlangzarh.

He hmalakna hnuaiah hian motor siamtute chuan an duh thu ngeiin, Automotive Industry Standard (AIS) 197 pawm ang thlapin test an neihtir thei dawn a ni. NCAP hmang hian motor test result aṭangin motor ṭhat lam leh him dan ratings pek ṭhin a ni ang.

"Car te chu an ṭhat leh him dan a zirin ratings pek an ni ang a, Adult Occupant (AOP) leh Child Occupant (COP)-ah te thliar an ni ang. Car lei tumte'n he ratings hmang hian motor him leh him lo bakah, an mamawh an hre thei ṭhin dawn a ni," tiin ministry thuchhuah chuan a tarlang.

BNCAP hnuaiah hian motor siamtu leh la lut ṭhinte chuan sorkar laipui ruat agency hnenah FORM 70-A hmangin motor test turin dilna an theh lut thei dawn a ni.

Sorkar hmalakna hi motor siamtu company lian, Mahindra & Mahindra chuan a fak a, Keini Mahindra te chuan Ministry of road transport and highways hmalakna hi huaisen kan ti a, Bharat NCAP hi kan lawm bawk a ni" tiin motor siamtute tan intluktlanna leh, India mite tana motor him zawk siamna kawngah inelna thianghlim tak a siam an rin thu an sawi.