BRICS Summit 2023 neih ṭan a ni

15th BRICS Summit, 2023 chu nimin khan South Africa-ah neih ṭan niin, summit hian August 24 thleng a awh ang.

Summit hi BRICS dintu ram - Brazil, Russia, India, China leh South Africa bakah, ram dang 15 hruaitute'n an hmang dawn a ni.

BRICS-ah hian member panga chauh awm mah se ram 40 dangin member nih an duhna an lantir tawh a, heng ram 40 zinga 22 te chuan ziakin BRICS member ram nih an duhna hi an thlen tawh bawk a ni. Afghanistan, Angola, Comoros, D.R. Congo, Gabon, GuineaBissau, Mexico, Nicaragua, Pakistan, Sudan, Syria, Tunisia, Turkey, Uganda, Uruguay, leh Zimbabwe te chuan BRICS member nih an duh thu hi an lo sawi tawh bawk.

Covid-19 hri leng avangin BRICS ramte hian kum thum chhung chu online-in summit an lo nei tawh a, tun hi kum thum hnua a taka kal khawma summit an neih lehna hmasa ber tur a ni. Russia President, Vladimir Putin chuan amah a kal theih loh tur thu sawiin, online-a a zawm mai tur thu leh Russia aiawh hian Foreign Minister, Sergey Lavrov a kal tur thu a sawi thung.

Prime minister Narendra Modi chuan nimin khan summit hmang tur hian Johannesburg a pan. Modi chuan summit an neih tur chuan member ramte tan nakin zela an thawhhona tur kawng a sial a beisei thu leh, kawng hrang hranga an hmasawnnate an thlirho theih a beisei thu a sawi. "Khawvel chhim lam ram zawng zawngte tana hmasawnna tur leh kan mamawhte sawi a, rel turin BRICS hi a ṭangkai em em a ni. Hmasawnna kawng mai bakah, ram hrang hrangte thawhho theih dan kawng pawh kan zawng bawk ang," tiin a sawi.

PM Modi hian summit hman zawhah South Africa aṭangin, Greece prime minister Kyriakos Mitsotakis sawmna angin Athens a tlawh ang. "Greece rama ka kal hmasak berna tur a ni. Kum 40 hnua India Prime Minister zinga Greece tlawh leh hmasa ber ka ni thei tur hian min tilawm," tiin a sawi a ni.