Thla leilungah Chandrayaan-3 a ṭum ta

India-in Thla leilung zir chiang tura a kah chhuah, Chandrayaan 3 chu nimin tlai dar 6:04 khan him takin Thla chhim tawp lamah a ṭum ta.

Chandrayaan 3 hi Sriharikota aṭangin July 14 khan kah chhuah a ni a, ni 44 zet a thang hnuah Thla leilungah hian a ṭum thei ta a ni. Thla leilung chhim tawpah hian tui a awma hriat a nih avangin zir chianna nei turin India hian Chandrayaan 3 hi a tir a ni. Chandrayaan 3 hi Thla leilung chhim tawp lama ṭum thei hmasa ber a ni ta a, India chu USA, China leh Soviet Union dawta Thla leilunga hlawhtling taka ṭum thei ram palina a ni ta bawk.

Indian Space Research Organisation (ISRO) chuan Thawhlehni khan X-ah post-in,"Chandrayaan 3 chuan a zin kawng tluang takin a zawh zel e," tiin, km 70 vela hla aṭanga Chandrayaan 3-in a lak, Thla thlalak an post tel bawk a ni. Chandrayaan 3-ah hian rover dah niin, hei hi Thla leilunga kal kuala a zir chiangtu tur a ni a, he rover hi Vikram lander chuan Thlaah hian a dah dawn a ni. Chandrayaan 3 ken rover hi khawvel hun chhiara ni 14 chhung hnathawk thei tura ruahman a ni a, ni 14 chhung hian Thla leilung chhim tawp lama an zir chian duh leh hriat duhte hre hman tura beisei a ni. Vikram lander hi India tana khawvel pawn zirna lama sulsutu pawimawh tak, Vikram Sarabhai hmingchawia phuah a ni tiin ISRO hian an sawi bawk.

Thla leilunga Chandrayaan 3 ṭum tur hi ram pumah nghakhlel taka thlir a ni a, school aṭanga a huhoa en te, van lam zirna tui mi ṭhenkhatin a lawmna hun an hman te hriat tur a awm. Prime minister Narendra Modi pawhin South Africa-a BRICS summit a hmanna hmun aṭangin live-in a lo en ve bawk.

Chandrayaan 3-in hlawhtling taka Thla leilung a ṭum hnu hian PM chuan Chandrayaan 3 hlawhtlinna atana ISRO-a thawktute lawmthu a hrilh a, India chu hnehtu leh India mipuite chu hlawhtlinna leh sulhnu ropui hnutchhiah hmutute an ni, a ti. Modi chuan,"Tuna kan hlawhtlinna hian India thar a hring a ni. Thlaah sulhnu kan nei ta a, nakin lawkah chuan Thla khi kan zinna a la ni thei dawn a ni," tiin, Johannesburg aṭangin video conference kaltlangin a sawi.