New Delhi-a G20 leaders summit-ah Biden tel dawn

US President Joe Biden chu September 7-10-a G20 leaders summit neih tura tel turin India-ah a rawn kal dawn.

White House chuan President Biden hi G20 summit denchhen hian khawvel hmun hrang hranga harsatna bakah Ukraine buaina chu ram dang hruaitute sawipui a tum tih a tarlang. G20 leaders summit neih tur hi India rama khawvel ram hruaitu hrang hrangte an kal khawm tam ber ṭum ni tura ngaih a ni. India hian Indonesia thlakin G20 President nihna hi nikum December aṭang khan a chelh ṭan a ni.

White House press secretary, Karine Jean-Pierre chuan,"President Biden hian G20-a a thawhpuite nen development bank inṭawm thuam chak bakah, sik leh sa inthlak chungchang te, Putin-a'n Ukraine a beih avanga sum leh pai leh khawvel buaina thleng te, energy ṭha zawk siam tura hmalakna neih te a sawipui ang," tiin a sawi. White House national security adviser, Jake Sullivan pawhin President Biden chuan G20 summit kar lakah ram hruaitu dangte kawm a tum thu a sawi ve bawk.

G20 hi khawvela developed leh developing economy ti-a kan sawi ram hrang hrang 20 te intel khawmna a ni. Member ramte economy hian khawvel pumpui GDP 80% vel henin, khawvel mipui hmun thuma ṭhena hmun hnihte awmna ram a nih bakah, khawvel ram zawng zawngte insumdawn tawnna 75% chuang chu G20 ramte inkara mi a ni.