Sorkar laipuiin March 2024 hmain rice fortification kalpui a tum

Food Ministry chuan Thawhlehni khan thuchhuah siamin, March 2024 hmaa rice fortification (Buhfai ṭhat zawkna tura nutrients; Iron, Folic Acid, Vit B12, pawlh) kalpui an tum thu an sawi. Hmeichhia leh naupanga anaemia natna titlem tura ei tur ṭha pekna tura buatsaih, fortified rice sem tum a nih thu hi sorkar chuan 2021 khan a lo puang tawh a ni.

Cabinet Committee on Economic Affairs (CCEA) chuan April 2022 khan fortified rice sem tur hian phalna a lo pe tawh a, Public Distribution System (PDS), Integrated Child Development Services (ICDS), Pradhan Mantri Poshan Shakti Nirman-PM POSHAN (Mid-day meal ni ṭhin) leh state leh UT zawng zawnga scheme kalpui ṭhenkhat hmanga kum 2024 hmaa sem chhuah tura ruahman a ni. Fortified rice siamna atan hian kum khata Rs. vbc 2,700 sen ngai tura rin a ni a, hei hi June 2024 thleng chu sorkar laipuiin a tum ang.

Food secretary Sanjeev Chopra chuan fortified rice chu sickle cell anaemia leh Thalassemia natna neite tan a ṭhat thu a sawi. Food Corporation of India (FCI)- in buhfai ton nuai 240 an neih mek zinga ton nuai 12 chauh chu fortified rice a nih loh thu sawiin,"March 2024 hmain khawvel hi fortified PDS rice hmel hriattir kan tum a ni. Tuna kan sem chhuah chak dan en hi chuan kan hun tiam hmaa zawh fel theih kan beisei a, thla rei loteah India PDS-a buhfai zawng zawngte hi fortified rice a ni ngei dawn a ni," a ti.

Kumin April aṭang khan state 27-a district 269 huam chhungah chuan PDS kaltlanga fortified rice an sem chhuah tawh thu leh, chu chu March 2023 atana an target tihhlawhtlinna a nih thu Chopra chuan a sawi bawk.