Chandrayaan 3 rover-in hna a thawk ṭan nghal

India-in Thla leilung chhim tawp lam zir tura a tirh, Chandrayaan 3 chu hlawhtling takin Nilaini zan tir khan a ṭum a, khawvel ram tam tak zinga Thla thleng thei tlemte zingah telin, Thla chhim tawp lama kal hmasa ber a ni ta bawk.

Chandrayaan 3 hian Vikram lander a pai a, he lander hi Thla leilungah ṭumin, Vikram lander hian Pragyan rover an tih chu Thlaa kal kual tur hian a tir chhuak ve leh a, tunah hian Pragyan rover hian Thla leilungah kal kualin hun a hmang mek tawh a ni.

Indian Space Research Organisation (ISRO) chuan Chandrayaan 3 chanchin hi X-ah post-in,"Chandrayaan-3 ROVER: India siam chu Thlaa awm tura siam a ni! Chandrayaan-3 rover chu lander-in a nghat fel tawh a, India chu Thlaah a kal kual mek a ni," tiin an tarlang. ISRO Chairman, S. Somnath pawhin lander leh rover te chu an him thu leh hna an thawh ṭhat theih thu a sawi a, lander leh rover-te thlalak chu an pho chhuah vat theih a beisei thu a sawi.

Vikram lander leh Pragyan rover-te hi lunar day 1 (khawvela ni 14) chhung hnathawk tura duan an ni a, hemi hun chhung hian rover hi Thlaah kal kualin, Alpha Particle X-Ray Spectrometer hmanruaa an thuam hmangin Thla leilungah eng ang chemical leh mineral nge awm tihte chiang leh zuala kan hriat theihna turin a la khawm anga, experiment-te pawh a nei chhin dawn a ni. Vikram lander pawhin payload panga neiin, heng hian tihtur hran ṭheuh an nei bawk. Lander-a payload pakhat, Laser Induced Breakdown Spectroscope an dah chu a ṭumna lai bawr vela Thla leilung awm dan zir tura siam a ni. Lander-a mi tho, RAMBHA-LP (Langmuir Probe) chuan lei chung langa plasma (ions leh electrons) awm tam zawng leh a danglam dan a zir chiang ve thung dawn a ni. ChaSTE an tih, Chandra's Surface Thermo Physical Experiment chuan Thlaa polar region boruak lum zawng leh rih zawng a zir dawn a, Lunar Seismic Activity chuan lander ṭumna chhehvela lei chet dan te a zir thung ang.

Pragyan rover hi solar energy-a innghat leh nung a ni a, ni 14 a ral hnuah chuan hna a thawh ṭhat theih beisei a ni tawh lo. Rover hian Vikram lander hnenah data a hlan chhawng ang a, lander hian lei lamah a rawn thawn chhawng ve leh dawn a ni.