NEP hnuaiah kum khatah board exam vawi hnih nei dawn

Ministry of Education chuan Nilaini khan New Education Policy (NEP) kalphung tur sawi zauna neiin, kum khatah board exam vawi hnih neih a nih tawh tur thu an sawi a, zirlaite chuan exam pahnih aṭanga an mark ṭha zawk chu an rin theih tur thu an sawi bawk.

Education Ministry thuchhuahin a tarlan danin, 2024 academic session atana zirlaibu tur pawh buatsaih fel vek a ni tawh. Pawl 11 leh 12 zirlai tan language subject pahnih tal zir a ngaih tawh tur thu leh, pakhat zawk chu India language zinga mi a ni ngei tur a ni, a ti.

NEP hnuaiah classroom chhunga zirlaibu chauh zir ṭhin chu tihtawp an tum thu sawiin, zirlaibu man tlawm zawk leh man man zawk siam turin hma an la dawn bawk a ni. NEP kalphung thar duannaa a lan danin, board exam buatsaih leh buaipuitute chuan exam an huaihawt hmain university hriatpui course kal zawh tur an nei tawh dawn a ni.

Board exam vawi hnih neih chhan tur an sawi fiahnaah; zirlaite dinhmun hriatna atan bakah, subject pakhat bel taka an thiam chuan a hnu zela coaching kal leh a ṭul fo tawh loh beiseina avang a ni an ti. Pawl 11 leh 12 zirlaite tana subject thlan ngai ṭhin pawh stream pakhat chauha thlan tur ni tawh loin, zirlaite'n rilru an siam thiam zawk theihna atan subject thlan pawlh theih a ni tawh dawn bawk.