Sorkar hnathawkte Minister leh MLA-te phone number save turin ti

Gujarat-a BJP kaihhruai sorkar chuan circular tichhuakin, sorkar hnathawk zawng zawngte chuan mipui thlan ram hruaitute phone number chu an save vek tur a ni, a ti.

Thawhlehnia Gujarat sorkarin circular a tihchhuahah,"Ram hruaitute'n office hour-ah official-te an landline-a an call a, meeting emaw, rokhawlhna avanga phone an lo chhang lo a nih chuan an remchan veleh an call let tur a ni. An PA emaw PS te'n call an lo chhang a nih chuan phone call chu record-in an dah ṭha tur a ni a, an hotute an hriattir leh bawk tur a ni," tiin an tarlang. Sorkar hnathawkte chuan mipui thlan ram hruaitu, MLA, MP leh Mayor leh district panchayat hruaitute pawh tiamin, an number an save vek tur a ni tiin thuchhuahah hian a tarlang.

Gujarat sorkar chuan hetianga an hmalakna chu ram siam ṭhat leh hruai hna an thawhnaa legislative leh executive inkara thawhhona boruak ṭha a awm theihna tur a ni, a ti. State BJP meeting hnuhnung berah MLA ṭhenkhat chuan sorkar hnathawk official ṭhenkhatin an phone call an chhan loh avang leh, biak theiha an awm ṭhin loh avangin an constituency-a hnathawh tam tak a buai phah niin an sawi a ni.