Delhi Airport-ah cocaine Rs. vbc 17 hu man

Directorate of Revenue Intelligence (DRI) chuan Kenya aṭanga lo kal mi pakhat hnen aṭangin IGI Airport, New Delhi-ah cocaine Rs. vbc 17 man hu an man tih Airport thuneitute chuan an sawi. DRI chuan Kenya mi vek, Delhi-a an man thurualpui ni-a an hriat chu Mumbai-ah an man thu an sawi bawk.

Thuneitute chuan cocaine neitu thu an zawh fiahnaah, Delhi aṭanga Mumbai pan turin ticket pawh a neih vek tawh thu leh, Mumbai-ah hian inhlan chhawn an tum tih hriat a nih thu an sawi. Mumbai-a lo nghaktu, a thurualpui, Kenya mi hmeichhe pakhat chu Mumbai-a Vasai area-ah an man chhunzawm nghal a ni.

DRI chuan an mi man chungchanga an thuchhuahah ,"Thawhlehnia Nairobi aṭanga lo kal a ni a, thu kan zawh fiah hian phalna nei loa thil lo ken a neih loh thu a sawi. Amaherawhchu, a bungrua kan en diknaah cocaine gram 1,698, international market-a Rs. vbc 17 man hu chu kan hmu chhuak a kan mansak ta a ni," tiin a tarlang.

Cocaine kengtu leh a thurualpui lakah hian Narcotic Drugs and Psychotropic Substances (NDPS) Act, 1985 hnuaiah thubuai ziah luh a ni.

January-June 2023 chhungin ram chhung hmun hrang hrangah DRI hian cocaine leh heroin hi ṭum 42 man tawhin, an ruihhlo man hi cocaine kg 31 leh heroin kg 96 a tling tawh.