Manipur CM-in chhungkaw 300 hnenah pre-fabricated house hlan

Manipur Chief Minister N Biren Singh chuan Nilaini khan Imphal East district-a Sajiwa Jail Complex-ah tualchhung buaina chhuak tuartu, chhungkaw 300 hnenah an awm lailawkna tura siam, in, pre-fabricated house a hlan.

Hlanna inkhawmah hian CM Singh chuan pre-fabricated house-te hi awm hlenna tur a ni lo a, relief camp-a khawsa mekte harsatna tiziaawm tura sak an nih thu a sawi.

Chief Minister chuan, "Hei hi hmalakna lailawk a ni. Kan ngaih pawimawh hmasak ber chu hill leh valley-a mite harsatna sutkian a ni. Hmun riatah pre-fabricated house-te hi sak an ni," tiin a sawi.

Pre-fabricated house hi chenna in, rem khawm chi a ni a, a structure hi hmun dangah sak niin, in sakna tur hmunah ready-made structure chu an rem khawm ṭhin a ni. Hmun pariatah pre-fabricated house hi Rs. vbc 149 sengin sak tum a ni a, hemi atan hian Prime Minister Ofice chuan Union Home Minister kaltlangin Rs. vbc 101 a pe chhuak tawh a ni.

Singh chuan Bishnupur district-a Kwakta-ah in 320, Sajiwa-ah in 400 leh Imphal East-a Sawombung-ah in 200 sak tawh niin, Thoubal district-a Yaithibi Loukol-ah in 400 sak a nih tawh thu a sawi.

CM chuan, "Valley lamah hian tun aṭanga ni 10-15 inkarah an insawn lut ang. Hmun hrang hranga awm nghehna tur in sak mekte enfiah hna pawh thawh mek a ni," a ti.

Kangpokpi leh Churachandpur district-ahte chuan an khawtlai hret dawn tih sawiin CM chuan, "Kangpokpi district-ah chhungkaw 700 chenna in sakna tur hmun hnihah en mek a ni. Hmun khat chu thlan tawh niin, ground levelling pawh tih ṭep a ni tawh. Churachandpur-a in sakna tur hmun pawh zawn mek a ni," tiin a sawi.

Singh chuan Manipur boruakin ziaawm lam a pan tih sawiin, "Buaina chhuah hlauhthawnna pawh a reh ṭep tawh a, nunphung pangngai a awm leh thuai kan beisei. Hei hi thawhhona avang chauha thleng thei a ni," a ti.