PM Modi-a'n Greece a thleng

Prime minister Narendra Modi chuan nimin khan Athens International Airport, Greece a thleng a; India ram hruaitu zingah kum 40 hnua Greece tlawh leh hmasa ber a ni. PM hi Greece foreign minister George Gerapetritis-a'n a lo hmuak.

PM Modi hian Johannesburg, South Africa-a 15th BRICS summit a tel hnuah Greece hi a pan a, Europe ramte nen inzawmna ṭha zawk neih theih beiseiin Greece ram hruaitute nena inbiakna neih duha kal a ni. Greece-a a cham chhung hian prime minister Mitsotakis nen inkawmin, Greece president Katerina Sakellaropoulou pawh a hmu bawk ang.

Ministry of External Affairs thupuangtu, Arindam Bagchi chuan,"Athens-a hun hman tur chu tih tur hrang hrangin a khat vek. Tombs of Unknown soldier-ah pangpar a dah ang a, chumi zawhah President hmuin Prime Minister nen inbiakna an nei chhunzawm ang," tiin PM Modi-a'n Greece a tlawh huna a hun hman dan tur X-ah a post. Modi hian Greece-a Indian community-te chu a thlenna hotel-ah hun a hmanpui bawk.

India ram hruaitu zinga Greece tlawh hnuhnung ber chu prime minister hlui Indira Gandhi niin September 1983 khan a tlawh. India leh Greece hian ram mipuite inzawmna thuk tak an nei a, an inkar boruak hi insumdawn tawnna, ralthuam hmanga inpuihna leh tuipui hmanga inkalpawhna hmangtein an ti ṭha chho zel a ni.