Trade Union 10 leh SKM-te BJP dodal turin thawkho dawn

Central Trade Unions (CTUs) 10 intelkhawm leh Samyukt Kisan Morcha (SKM) te chuan kum 2024 inthlanpui lo awm turah, BJP sorkar paihthla tur leh an policy dodal tura thawkho turin, Ningani zan khan All India Joint Convention of Workers and Farmers huaihawtin inremna an siam.

Convention-a kalte chuan central-a BJP leh Modi sorkar bakah state hrang hranga BJP sorkar paihthlak chu an tum ber a nih tur thu an sawi. He pawl thawkho hian December 2023 leh January 2024 inkarah ram pum huapa nawrh huaihawt an tum thu an sawi bawk.

Joint Convention chuan ram chhunga loneitu leh kut hnathawktu zawng zawngte chu inlungrual tur leh, tuna sorkar laiin corporate lian a vulhna hmanrua atana policy hrang hrang a duante chu do tlat turin a sawm."Corporate-te tan chauha hmalakna hian thlai thar leh loneitute dinhmun a tichhia a, loneitute hamṭhatna tura hmalakna a awm loh avangin chhungkaw tam takin tuarin, loneitute zingah leiba ngahna leh intihhlumna bak a thlen lo a ni," a ti. Hnathawh tur hmu lo pung nasa te, hna nghet vang leh nitin mamawh thil man sang zel te pawh sawiho a ni a,"Labour code thar hmanga kuthnathawktute chanvo laksak a ni zel leh, an hna a ngheh loh leh hlawkna a tlem avanga rethei zual zel, hmun hranga hnathawktute dinhmun pawh sawi tel a ni," tiin a tarlang bawk.

CTU 10 leh SKM te'n joint convention an neih zawhah hian declaration inṭawm siamin, sorkar laipui policy ṭhenkhat avangin retheihna a nasa zual a, sumdawnna te deuh leh bul ṭantirte chuan an tuar a, corporate lian zingah an hausakna pung thur thur an awm a, an hnathawkte dinhmun erawh a chhe hle thung, an ti. India hi tun hnaiah naupang enkawl ṭhat lamah te, hmeichhe himna chungchang leh human rights bakah, press mite zalenna kawngah a tlahniam nasa hle bawk niin an tarlang.