HP-a chhiatna thlenna hmun aṭangin mi 50 chhanchhuak

Himachal Pradesh-a Mandi district-a Shehnu Gouni khuaah, ruah leh ṭek nasa tak thawk thut avanga leimin leh lei chhia avanga tang mi 50-te chu Ningani tlai khan National Disaster Response Force (NDRF) team chuan an chhanchhuak.

NDRF team hi chhanchhuah hna thawk tur hian kein km 15 zet an kal a ngai a, leiminin kawng a hnawh avanga kal tlang thei lo leh tang zingah hian naupang 15 an tel. An chhanchhuah takte hi hmun him lamah an dah vek tawh thu an sawi bawk. Hetih lai hian Baddi area leh Pinjaur inkalpawhna, Balad luia Maranwala lei dawh chu ruah sur nasa avanga lui tui lianin a la bawk a, thi leh hliam an awm erawh hriat a ni lo niin thuneitute chuan an sawi.

Himachal Pradesh-ah hian fur ṭan tirh, June 24 aṭanga August 24 inkarah ruah sur nasa avangin mi 242 an thi tawh nia report a ni. PWD pawhin chhiatna hrang hrang thleng avangin Rs. vbc 2,829 man hu an chan tawh tih an sawi. Ruah sur nasa avang hian kawng 709 zet chu hman theih lohin a awm tawh a ni.