Parliamentary panel-in criminal law bill thlakna tur ennawn ṭan

Parliament monsoon session neih zawh taka pawm, Indian Penal Code, 1860, Criminal Procedure Code, 1898 leh Indian Evidence Act, 1872 thlakna tur The Bharatiya Nyaya Sanhita Bill, 2023, Bharatiya Nagarik Suraksha Sanhita Bill, 2023, leh Bharatiya Sakshya Bill, 2023 te chu parliamentary panel-in Ningani aṭang khan a ennawn ṭan.

Panel meeting-ah hian DMK MP Dayanidhi Maran chuan bill pawm a nih hun leh bill-in tihdanglam a tum thilte chu a rinhlelhawm thei niin a sawi. Maran chuan bill hming atana Hindi hman chu India danpui Article 348-in bill leh act zawng zawng atana English hman tur a tih a kalh a ni, a ti bawk. "Bill thlakna hminga Hindi hman hi ṭawng chi hrang hrang hmang chunga kan inpumkhatna, India tan chuan inṭhen hran theihna thil a ni. State zawng zawng inbiakpawhna chu English a ni a, chu chu ram pum tan pawh hman tur a ni. Hindi hming hman tumna hi chu thlak leh rawh u," tiin a sawi. Maran hi Rajya Sabha-a Congress MP Digvijata Singh chuan a thlawp thu sawiin, Hindi hmanna hmun aṭang lo kal ni mah se, bill thar hming chu lam har a tih ve tho thu a sawi.

Home secretary Ajay Bhalla chuan Dayanidhi Maran thusawi zawh hian bill chungchangah presentation a pe a, Evidence Act thlakna tur, Bharatiya Sakhshya Bill, 2023 hmang chuan Minister leh President inkara inbiakna thlengte court hmaa phawrh turin court-in a phut thei tawh dawn lo a ni, a ti. Indian Penal Code thlaktu tur, Bharatiya Nyay Sanhita, 2023 chuan puipunna leh pun- khawmna hmuna hre reng chunga hmanrua leh hriamhrei ken phal lohna chu a paih a, hmanrua nena training neih leh zir te phal lohna pawh a paih tel bawk thu a sawi. Criminal law bill thar chungchang ngaihtuaha ṭhu khawm, Parliamentary panel on Home Affairs meeting hi vawiinah neih chhunzawm a ni ang.