PM Modi-a'n Mann Ki Baat vawi 104-na hmang

Prime minister Narendra Modi chuan nimin khan thla tina radio programme a hman ṭhin, Mann Ki Baat vawi 104-na a hmang.

PM Modi chuan India-in thla leilunga hlawhtling taka Chandrayaan-3 a ṭum tir chungchang sawi chhuakin, he hlawhtlinna ropui tak hi ṭawngkama sawi zawh sen a ni lo, a ti. Indian Space Research Organisation-a hmeichhe scientist-te chu fakin, Chandrayaan-3 mission chu hmeichhiate chakna entirna a ni tel nghal a ni, tiin a sawi. He mission-a tha thawhtu zingah hian hmeichhe scientist leh engineer tam tak an tel a ni, a ti.

G-20 atana India inbuatsaihna chungchang pawh sawichhuakin, Prime Minister chuan September thlaah hian India theihna tak tak chu hmuh a ni dawn a, G-20 Leaders Summit neih tur atan India chu a inbuatsaih fel tawh a ni, a ti. Delhi-ah ram leh pawl hrang hrang 40 hruaitute an kal khawm dawn a, hei hi G-20 Summit neih tawha ram/pawl hruaitu tel tamna ber tur a ni dawn tih a sawi bawk.

Prime Minister chuan World University Games, China-a neiha medal dawngtute chu a lawmpui thu a sawi bawk. Infiamna lamah India chuan hlawhtlinna hrang hrang a chan thute sawiin,World University Games neihah pawh India chu a chet ṭhat ṭum ber a ni, a ti. India hian gold medal 26 a la a ni.

Kumin Independence Day lawmna puala Har Ghar Tiranga campaign a hlawhtlin thu pawh sawiin, post office nuai 1.5 kaltlangin India flag vaibelchhe 1.5 hralh chhuah a ni a, website-a tricolour nena an selfie post chu nikumah mi vaibelchhe 5 vel an nih laiin, kuminah chuan vaibelchhe 10 an tling a ni, a ti.

Modi chuan September thla chhungin ram chhunga khaw tin aṭangin lei (soil) lakhawm campaign neih a ni dawn a, heng lei hi Amrit Kalash urn-ah dahin, October thla tawpah chuan Amrit Kalash Yatra hian India ram khawpui Delhi a thleng dawn a ni, a ti. Ram chhung hmun hrang hrang aṭanga lei lakkhawm hmang hian Delhi-ah Amrit Vatika din a ni dawn tih a sawi.