Pawl 70 chuangin G20 ep turin 'We 20' an din

Ram chhunga pawl 70 kal khawm chuan G20-in economy leh politics chungchanga hmalakna a neih hrang hrangte duh loa dodal turin 'Peolple's Summit' an buatsaih sa, 'We 20' tiin an inphuah.

We 20 hian G20 policy hrang hrangte chu beih let an tum thu an sawi. Hmalakna tura duan draft paper 13 buatsaihin, heng; agriculture, climate change, banking, finance, labour, employment leh democracy dinhmun tlak hniam dante an tarlang.

An paper buatsaiha a lan danin democracy kalphung tlak hniamna kawngah hian sorkar enkawl ni lo pawl ṭhenkhatin foreign funding an hmuh chungchang buaipui an tum deuh ber a ni. "Pawl kal zelna leh hnathawhna atan NGO tam tak chu Foreign Contribution Regulation Act-ah an innghat a, mahse, hengte hian FCRS hnuaia an license tihtawp emaw tihkhawtlaisak an tawk nasa em em. Hetiang boruak hnuaiah hian NGO-te hnathawh a tawp a, an zara ṭanpuina dawng a, an hnathawh kaltlanga hlawkna lo changtu tam tak, ram hruaitute'n an ngaihsak bawk si lohte chuan an tuar ta ṭhin a ni," tiin an sawi.

We 20 paper buatsaihah chuan journalist leh activists ṭhenkhat man an ni chu sorkar lai kalphung ṭhat tawk lohna lantirtu a nih thu an sawi bawk.

Agriculture lama thawktute leh a zuartute chu inremna mumal zawk neihpui a ṭul thu leh, sumdawng lian lo inrawlh ṭhin chu tihtawp a ngai tiin, "Sumdawng company lian tak takte thiltih hian loneitu leh sumdawng tenau zawkte chu sustainable agriculture hawia thil kalpui thei lo turin an dal a ni. Hemi chungchangah hian G20 ram, India angte hian ram te zawkte hnenah sawi tur a nei ang," tiin an tarlang.

Labour and Employment paper-ah pawh kuthnathawktu tam zawkin harsatna an tawh dan tarlangin, India rama kuthnathawktu 10-a pakua te chuan hna nghet leh hnaa an himna tur eng thil mah an neih loh thu an sawi. Inequality paper-ah chuan India rama mi hausa tlemtein sorkar hmalakna an hlawkpui zawk dan tarlan a ni bawk.