Delhi-a G20 summit neihna tur kawngah Pangpar khawi nuai 6 chuang dah dawn

Delhi-a G20 summit neih tur atan kawng hrang hrangin inbuatsaih zel a ni. Raj Niwas (Delhi-a Governor chenna) official chuan September-a G20 summit neihna tur hmun leh a panna kawngpuite chu pangpar khawi leh phun hmanga chei tum a nih thu an tarlang. Pangpar khawi leh phun tur hi nuai 6.75 a ni tih a sawi bawk.

New Delhi-a kawngpui leh hmun an chei tur atana an thlan zingah hian Sardar Patel Marg, Mother Teresa Crescent, Teen Murti Marg, Dhaula Kuan-IGI Airport road, Palam Technical Area, India Gate C-Hexagon, Mandi House, Akbar Road roundabout, Delhi Gate, Rajghat leh ITPO te an tel.

September-a G20 summit thleng tur hian Delhi Lt. Governor, VK Saxena chuan Delhi-a thuneitu ṭhenkhatte inbuatsaihna meeting a neihpui a, kawngpui leh hmun ṭhenkhat chei runpui nei tur hian an pangpar mamawh leh an duh angte lo la khawma lo ngaihtuah turin agency-te an ruat.

Forest Department leh Delhi Parks and Garden Society te chuan pangpar nuai 3.75 an dah dawn a, PWD-in 50,000, DDA-in nuai 1, NDMC-in nuai 1 leh MCD-in 50,000 an dah bawk dawn a ni. Heng zawng zawng aṭang hian kawngpui 61-ah pangpar nuai 4 chuang hret dah a ni tawh a, dah la ngai zawng hi September kar hmasa berah hian dah fel hman tura ruahman niin, G20 summit laia pangpar zawng zawngte par chhuak vek hman tura beisei a ni.