NREGA hlawh ABPS hmanga pek a ni tawh dawn

Sorkar laipuiin Mahatma Gandhi National Rural Employment Guarantee Scheme (MGNREGA) hnuaia thawkte tana hlawh pek dan tur thar a duan, Aadhar- Based Payment System (ABPS) chu September 1 aṭanga hman ṭan tur ni mah se, tun dinhmunah thawktu 57.75% chauh ABPS hnuaiah inziak felin, hlawh an la thei dawn a ni.

ABPS kaltlanga hlawh la thei tur hian MGNREGA hnuaia thawkte chuan job card neiin, an job card hi an bank account leh Aadhar card nen an thlunzawm a ngai. An account chu National Payments Corporation of India (NPCI) nen mapping an tih hmangin a inzawm leh tur a ni bawk. Aadhar leh NCPI mapping hi tihfel a harsat bakah, hlawh lak theih loh leh job card paihsak an awm ṭhin a, hei vang hian thawktu leh activists ṭhenkhat chuan ABPS duh lo hian lungawi lohna an lo lantir tawh.

LibTech-in data an lak khawm aṭanga a lan danin ram chhunga NREGA hnuaia hnathawk zawng zawng vbc 26.84 zingah 57.75% chuah chu mumal taka August 31 thlenga hlawh la thei an ni.

Union Ministry of Rural Development- in a tarlan danin August 26 thlenga NREGA hnuaia thawk mek, mi vbc 14.4 zinga 81.50% chu Aadhar-Based hmanga hlawh la thei dinhmunah an ding a, ABPS hnuaia hlawh la thei lo zingah hian Meghalaya, Nagaland, Assam, Lakshadweep leh Arunachal Pradesh mite an tam ber.

Sorkar laipui hian ABPS hmanga hlawh pek hi kumin February aṭanga hman ṭan tawh tur tiin thuchhuah siam mah se, inziah felna hun siam belhin August 31 thleng a pawtsei a ni.