China-in official map a siam tharah Arunachal Pradesh rin lut

China sorkar chuan Thawhṭanni khan "National Mapping Awareness Publicity Week" hmangin, he hunah hian an ram map thar '2023 edition of the standard map of China' chu an tichhuak a,Arunchal Pradesh pumpui leh Aksai Chin area te chu an ram chhungah an rin lut.

Map thar berah hian April thlaa an lo puan tawh angin, Arunachal Pradesh-a khaw 11 chu a hming a phuah ṭhat hminga tarlan an ni a, heng zingah hian Arunchal Pradesh khawpui, Itanagar khaw bula mi pawh a tel a ni.

China-in 2023 map an tih mai hi Ministry of Natural resources siam a ni a, a hmaa map an rin ang bawkin, khawthlang lam ramri, South China sea zawng zawng huama nine-dash line an tih mai chu a ngai an la ring. Tenth-dash line an tih, Taiwan chhak lam thlenga an rin chu, Taiwan neitu an ni tih lantir nan an la ring bawk.

Ministry of Natural Resources chuan map thar an siam bakah hian digital map an buatsaih nghal tur thu an sawi bawk a ni. China-in map thar a tihchhuah hi India hruaina hnuaia India-in G20 summit a thlen tur dodalna niin mi tam tak chuan an ngai a, khaw hming a thlak pawh hi a vawi thumna a ni tawh. Hetih lai hian President Xi Jinping chu G20 summit neih turah hian India-ah a lo kal dawn thung.

Kumin hi People's Republic of China hnuaia Law of Surveying and Mapping din kum 30-na a ni. He dan hi survey bakah map siam leh enkawl chungchanga China sorkar tha tichak tura siam a ni. China President, Xi Jinping hian kum 2022 khan border law thar siamin, ramri enkawlna kawngah khauh leh zualin thil a kalpui a, an ram chhunga an rin tel, khua leh hmun hming tihdanglamna pawh Article 7 hnuaiah dah a ni a, Article 22 chuan China sipaite chu ramri bula drill nei ṭhin turin a ti bawk a ni.