G20 summit-ah Putin inlan thei dawn lo

Russia president Vladimir Putin chuan Thawhṭanni khan prime minister Narendra Modi chu phone hmanga biain, September 9-10 a Delhi-a G20 summit neih turah a tel theih loh tur thu a hrilh.

Putin hian Modi chu G20 summit-a a tel theih loh tur thu a hrilh rual hian Russia ram aiawh turin Foreign Minister, Sergey Lavrov a kal dawn thu a hrilh nghal a ni. Modi pawhin Russia dinhmun a hriatthiam thu sawiin, India kaihhruaina hnuaia G20 hmalaknate a thlawp ṭhat avangin Putin chu lawmthu a hrilh bawk niin External Affairs Ministry thuchhuah chuan a tarlang.

Putin hian February 24, 2022 aṭanga Ukraine-a special military operation neih a nih hnuah khawvel huapa meeting hrang hrang a kal lo zeuh zeuh tawh a, Bali-a G20 summit neih leh Johannesburg-a BRICS summit-ah pawn a inlan lo. Delhi-a G20 summit a kal loh tur thu hi Turkey President, Recep Tayyip-a'n Spetember 8-a Putin-a hmu tura Moskow a kal tur thu a puan hnu lawkah hriat a ni. Tayyip hian G20 hmang tura Delhi a pan hmain Russia kal hi a tum nia hriat a ni.

Delhi-a G20 summit neih turah hian Ukraine-a indona thleng mek chungchang sawiho a ni dawn. March thlaa G20Foreign Minister-te inhmuh khawmnaah khan sawiho a lo ni tawh bawk.