Delhi khawlai cheina sum chungchangah AAP leh BJP inbei leh

New Delhi-a September 9-10 chhunga G20 summit neih tur atan, Delhi khawlai hmun tam tak chu nasa taka chei a ni. BJP chuan Delhi-a sorkar lai AAP chu Delhi chei chungchanga hmingṭhatna lo lak ve tumah puhin, khawlai cheina zawng zawng chu sorkar laipui tum a nih thu an sawi.

BJP puhna hi chhangin, AAP sorkara minister, Saurabh Bharadwaj chuan Thawhṭanni khan Delhi tana hmalakna nei tur leh pawisa pe chhuak tuirn India constitution chuan Lt. Governor hi eng thuneihna mah a pe lo niin a sawi. Saurabh chuan,"Heng thil cheina zawng zawng hi Delhi sorkar pawisa a ni, sorkar pawisa ka tih hian tax petute pawisa ka tihna a ni. Mipuite hian Lt. Governor pawisa emaw tiin an hriat sual ka duh lo, centre emaw Lt. Governor hian a hranin pawisa an nei lo," a ti. Project 89 kal mek hnuaia kawngpui chei ṭhat leh chei mawite tarlangin, PWD-in an tihfai bakah thing phunte a tel tiin,"PWD emaw MCD hnathawhna zawng zawng hi chhiah petute pawisa a ni, PWD hian central aṭangin pawisa an dawng reng reng lo," a ti bawk.

Saurabh chuan Constitution-a eng article-ah mah LG hi pawisa pe chhuak tura thuneihna pek a ni lo , a ti. A duh a nih chuan kawngpuite a endik thei a, Prime Minister leh Home Minister-te pawhin an endik thei a, hei erawh chu an dodal reng reng lo tih a sawi a ni.

Lt. Governor Saxena pawhin Saurabh thusawi hi DDA event-ah chhang ve lehin,"Thil tam tak sawi ngaiin ka hre lo, kan hna erawh kan chhunzawm zel tho ang. Kan hnathawhte avanga miin hmingṭhatna an lo la duh a nih pawhin la mai rawh se, kan thawk ṭha tihna a ni mai," a ti ve bawk.