Scholarship dik lo chungchangah CBI-in thubuai ziak lut

Central Bureau of Investigation (CBI) chuan dan dik loa minority scholarship dil eng emaw zat hmu chhuakin, hemi kaihhnawihah hian bank leh zirna in bakah hmun danga thawk mi eng emaw zat an man. IPC section-a inbumna, seal leh signature thil lem siam, leh phiarrukna bakah, prevention of corruption Act hnuaiah thubuai an ziak lut nghal bawk.

CBI official-te chuan institution lem 830 zet hmangin scholarship-te hi dil an ni a, heng scholarship dik loah hian Ministry of Minority Affairs sum, Rs. vbc 144 zet pek chhuah a ni tih an sawi.

"Scholarship scheme hnuaia fund hman dan dik lo chungchang report kan dawn aṭangin National Council of Applied Economic Research (NCAER) chu scholarship dilna ennawn leh turin kan ruai a ni. National Scholarship Portal (NSP) kaltlangin keimahni ngeiin kan endik ve leh bawk," tiin Ministry of Minority Affairs chuan an tarlang. NSP hmang hian institution rinhlelhawm zual 1,572 thlan chhuahte chu an endik vek thu an sawi. Heng institution-te hi state 21-a mi niin, chung zinga 830 te chu tihtawp tawh an ni.

Minority Affairs Ministry chuan NSP hmanga data digitized an en let theih chin zawng chu 2017 aṭang a nih thu leh, 2017 leh 2022 inkara heng insitution lem hnena scholarship pek chhuah chu Rs. vbc 144 a tlin tawh thu an sawi. Kum 2017 hma lamah engtia rei nge kalpui a lo nih tawh hriat theih a nih loh avangin Rs. vbc 144 ai hian a tam fe theih thu an sawi.