J&K-a Srinagar kawtthler leh in tin ID neihtir dawn

Jammu and Kashmir Lt. Governor chuan district tina thuneitute'n mamawh huna mihring leh khawi hmun pawh awlsam zawka an zawn hmuh theihna turin, Srinagar-a in zawng zawng leh khawlaite chu ID an pe vek dawn tih a sawi.

Kashmir Divisional Commissioner Vijay Kumar Bidhuri chuan,"Srinagar-a in tinte hi ID hran ṭheuh pek an ni ang a, kawtthlerte pawh ID hran pek vek an ni ang. Kawtthler hming leh hmun hming inang a tam em avangin heng ID hmang hian tu pawhin awlsam takin an zawn duh an hmu zung zung thei tawh dawn a ni," a ti. Hetianga ID hran pek bul ṭanna hi 2022 aṭang khan kalpui ṭan ni tawhin, Srinagar-a SMC area-ah neih a ni tawh a, in tinah chhinchhiahna plate siam vek a ni.

2011 census aṭanga a lan danin Srinagar district-ah hian in 1,91,678 a awm a, mihring 12,36,829 awmin; mipa 6,51,124 leh hmeichhia 5,85,705 an awm bawk. In tina ID an neih tur hi Family No. ti-a chhinchhiah tur a ni a, digit riat code nei niin, chhungkaw member zat, an hming, kum, zirna, hnathawh zawng zawng pawh chhinchhiah a ni tel dawn bawk. He data hi chhungkaw remtihnaa lak khawm a ni ang.