Sorkar laipuiin LPG man a tihniam

Sorkar laipui chuan Thawhlehni khan domestic consumer tan ei rawngbawlna gas, Liquified Petroleum Gas (LPG) cylinder pakhat man chu Rs 200-in a tihniam.

Union minister Anurag Thakur chuan domestic LPG cylinder man tihniam a nih thu hi puangin, hei hi prime minister Narendra Modi-a'n Raksha Bandhan leh Onam puala ram chhunga hmeichhiate tana a thilpek a ni, a ti.

Domestic LPG bur khat man hi Rs 200-a tihhniam a nih bakah, Pradhan Mantri Ujjwala Yojana (PMUY) hnuaiah Rs 200 dang tihhniam belh a ni bawk a, Ujjwala scheme beneficiary-te tan LPG bur khat hi Rs 400-in a tlawm tawh dawn a ni.

Thakur chuan kum 2014-a central-a BJP-in sorkarna a siam tirh khan ram pumah LPG domestic connection nei hi mi vaibelchhe 14.5 an ni a, kuminah chuan vaibelchhe 33 an tling tawh tih a sawi. Ujjwala scheme hnuaiah hian consumer hi vaibelchhe 9.6 an awm bawk a ni. Sorkar laipui chuan Raksha Bandhan leh Onam pualin Ujjwala scheme hnuaiah hmeichhe nuai 75-te hnenah gas connection a thlawna pek a tum thu a sawi bawk.