China-in map thar siam chungchangah chiai lo turin India a hrilh

China-in an ram map thar '2023 standard map of China' an tihchhuah hnuah India chuan nasa taka sawiselin an pawm ve loh thu an sawi. India lungawi lohna hi China chuan August 30 khan chhangin, China tih ṭhin dan ve reng a nih avanga ti chauh an nih thu leh, an map thar chu la thutak lo turin India an hrilh.

Thawhṭanni khan China hian an ram map siam thar tichhuakin, he map-ah hian Arunchal Pradesh leh Aksai Chin bakah, South China Sea zawng zawng chu a ram chhungah a rin lut a ni. China map thar hi India chuan sawiselin, a hma pawhin China hian Arunchal Pradesh chu an ram chhunga an rin luh tawh thu leh, tuna an rin luh nawn hian ram pahnihte inkara boruak rit tak awm mek tichhe zual tur a nih thu an sawi.

Hetih lai hian China chuan India tan buaina vak tur a awm loh thu hrilhin, China Foreign Ministry thupuangtu, Wang Wenbin map thar siam chu an thiltih ṭhin reng a nih thu a sawi."Dan anga kan rama thuneihna lantirna atana ti mai kan ni. India pawh chiai mai loa rilru zau tak pu chungin la thutak lo turin kan duh a ni," tiin a sawi. China hian 2019-a India-in J&K a ṭhen hran tak, Ladakh UT a ram map-a a tarlang chu an duh loh thu an sawi ve tawh bawk.

Thawhlehni khan external affairs minister S. Jaishankar chuan China map thar siam a sawiselnaah,"India hi chuan kan ram chin hi kan hre chiang viau a ni. China-in awm ang lo lutuka a ram chin a rin avang hian midang ram kha an ram a ni ta tihna a ni lo," a lo ti tawh bawk a ni.