I.N.D.I.A-in Mumbai-ah meeting nei

Eptu party hrang hrang intel khawm, Indian National Developmental Inclusive Alliance (INDIA ) chuan nimin khan Mumbai-a Grand Hyatt hotel-ah meeting vawi thumna an nei leh a, vawiinah an chhunzawm ang.

Meeting-ah hian logo bakah coordination committee leh 2024 inthlanpuia BJP paih thla tura an hmalak dan turte an rel dawn a ni. INDIA hian June thla khan Patna-ah meeting hmasa ber an lo nei tawh a, July khan Bengaluru-ah meeting vawi hnihna an lo nei tawh bawk.

Tun ṭum meeting-ah hian party 28 aṭangin mi 63 kal tura beisei an ni a, chief minister eng emaw zat bakah party hruaitu langsar tak takte pawh an kal dawn a ni. Mamata Banerjee, Tejashwi Yadav leh Lalu Prasad te chu a thleng hmasaah an tel a, nimin khan Arvind Kejriwal, Bhagwant Mann, Nitish Kumar, Mallikarjun Kharge, Sonia Gandhi leh Rahul Gandhi-te pawhin Mumbai hi thleng ve lehin, Maharashtra Chief Minister hlui Uddhav Thackeray-a'n zanriah a lo buatsaihsak a ni.

INDIA-ah hian regional party pahnih Peasants and Workers Party of India (PWP) leh party thar pakhat lak luh belh an ni a, heng party-te aiawh pawh hi meeting-ah hian tel tura ngaih an ni. INDIA logo tur an thlan fel chuan tun meeting zawhah hian an tlangzarh nghal ang. Party tinte'n thawhhona ṭha zawk an neih theihna tur atan coordination committee din chungchang an sawi dawn bakah, convener neih chungchang te, 2024 election atana hmalakna hmasa turte pawh an sawi bawk ang.

Meeting neih hmaa press conference an neihah, NCP hruaitu Sharad Pawar chuan inthlan huna seat insem dan tur an la sawi loh thu leh, India dinhmun siam ṭha tur atan INDIA chuan theihna nasa tak a nei tih a rin tlat thu a sawi. West Bengal CM, Mamata Banerjee pawhin,"India hi kan PM tur a ni ang. Kan ngaihpawimawh ber chu tunge PM tih lam ni loin kan ram chhan hi a ni," a ti bawk. INDIA hian Prime Ministerial candidate tur la sawi lo mah se party hrang hrang spokesperson-te chuan an party hruaitute ṭheuh an rin thu an sawi hlawm a ni.