I.N.D.I.A.-in logo tlangzarh hun sawn

Eptu pawl intel khawm, INDIA chuan nimin khan Mumbai-ah meeting an neih mek chu chhunzawmin, party hrang hrang 28 aṭangin hruaitu eng emaw zat an kal a ni. Ruahman lawk ang chuan nimin khan INDIA logo tlangzarh nghal tura tih a ni a, mahse, ṭangrual pawla tel party hrang hrangte'n logo design, rawng, size leh thil dangte sawiho leh an la duh avangin tlangzarh hun tur hi an sawn leh a ni. Tlangzarh a nih hunah, INDIA-a tel party hrang hrangte chuan an party hming leh election symbol bulah he logo hi an dah lang ang. Nimin khan party hrang hrangte thawhhona tur coordination committee din chungchang relin, convener neih leh neih loh bakah, spokesperson ruat chungchang te pawh an sawi bawk a ni.

Coordination committee-ah hian member 13 an awm dawn a, an pawl thawhhonaa thuneitu sang ber tur a nih thu an sawi. He commitee-ah hian KC. Venugopal, Sharad Pawar, MK Stalin, Tejashwi Yadav, Abhishek Banerjee, Sanjay Raut, Hemant Soren, Raghav Chadha, Javed Ali Khan, Lallan Singh, D. Raja, Omar Abdullah leh Mehbooba Mufti te an tel. Coordination committee bakah hian sub-group pali dang siamin, heng sub-group te hian campaign leh rally bakah, social media enkawl leh data vawn hnate an thawk dawn a ni. Nakkum inthlanpui atana seat insem dan tur chungchangah erawh September 30-a thutlukna an siam chauh tur thu an sawi thung.

Meeting-ah hian Congress aṭangin president Mallikarjun Kharge bakah hruaitu dang Sonia Gandhi leh Rahul Gandhi te an tel a; Bihar chief minister Nitish Kumar, Tamil Nadu CM M K Stalin, Samajwadi Party (SP) hruaitu Akhilesh Yadav leh Rashtriya Lok Dal (RLD) chief Jayant Chaudhary te pawh nimin meeting-ah hian an tel a ni. Uddhav Thackeray, NCP chief Sharad Pawar, West Bengal chief minister Mamata Banerjee, Bihar Deputy chief minister Tejashwi Yadav leh Rashtriya Janata Dal (RJD) chief Lalu Prasad Yadav te, Jammu and Kashmir CM hlui, Farooq Abdullah te pawh meeting-ah hian an kal ve bawk.