Sorkar laipuiin 'One Nation, One Election' ngaihtuah tur panel din

Parliament special session koh a nih hnu lawkah sorkar laipui chuan a ruala Lok Sabha leh state assembly inthlan neih a nih theihna tura ngaihtuahna lo seng a, zir chianna lo nei turin 'One Nation, One Election' panel din a nih thu a puang. He panel hi President hlui Ram Nath Kovind chuan a kaihruai dawn a ni.

'One Nation, One Election' chungchang hi Parliament special session neih a nih huna ngaihtuah tur zingah a tel rin a ni a, mahse, sorkar lam chuan engmah a la sawi chiang lo thung. BJP leh PM Modi hian inthlan hun inang neih hi vawi tam tak an lo sawi tawh a, kum 2014 inthlan dawna an party manifesto-ah khan a tel bawk a ni.

BJP hian 2014 inthlan neih a nih dawn khan an campaign au hlaah ram chhunga state assembly leh Lok Sabha inthlan chu a ruala neih a nih ngei theihna tur atana hma an lak tur thu hi an sawi a ni.

Lok Sabha leh State assembly inthlan hi kum 1967 hma lam zawng kha chuan a ruala neih ṭhin a ni a, inthlan ṭum li lai a ruala neih a ni. Mahse 1968 leh 1969 chhungin state ṭhenkhatah sorkar lai ṭhiah a nih avang leh a vawi khatna atana kum 1970-a Lok Sabha pawh ṭhiah a ngaih tak avangin a hun inang tlanga inthlan neih ṭhin chu kal san a ni ta hret hret a ni.

Modi hian kum 2016 khan a ruala inthlan neih hi a sawi chhuak a, 2019 Lok Sabha inthlan neih zawhah pawh khan hemi chungchangah hian all party meeting koin, eptu party hruaitu eng emaw zat an tel duh lo a ni. PM hian inthlan hun rual lo nuai chu ram sum leh pai tihektu a nih thu leh, sorkar tan pawh a hrisel lo niin a sawi.

Hetih lai hian mithiamte chuan 'One Nation, One Election' puitlin tur chuan constitution siam ṭhat a ngaih tur thu an sawi a, chu chu Lok Sabha leh Rajya Sabha-ah member hmun thuma ṭhena hmun hnihin an pawmpui ve ve a ngai dawn a ni an ti.