Commercial gas man tihniam ve leh

Raksha Bandhan puala Domestic LPG gas bur pakhat man tihhniam a nih hnuah Public Sector Oil Marketing Companies (OMCs) te chuan commercial LPG gas bur, kg 19 chite chu Rs. 158/-in a man an tihhniam thu an puang.

Sorkar laipui chuan Raksha Bandhan denchhenin hmeichhiate hnena thilpek angin Nilaini khan Domestic LPG gas man Rs. 200/-a tihhniam a nih thu hi a puang tawh a, nimin khan commercial gas man hi tihhniam a ni ve leh ta a ni. Gas man tihhniamna hi hman ṭan nghal tur a nih thu OMCs chuan a sawi.

Commercial leh domestic LPG gas bur man hi thla tin ennawn ṭhin a ni a, tuna rate tharte hi September 1 aṭanga hman ṭan nghal tur a ni. August thla khan commercial LPG gas man hi Rs. 99.75/- in tihhniam a lo ni tawh a, July thla khan Rs.7/-a tihpun a ni thung. Kumin chhung hian tuna LPG gas bur man hi vawi eng emaw zat tihhniam leh tihsan a lo ni tawh a, commercial LPG bik hi May thla khan Rs. 172/-a tihhniam niin, June thla kha Rs. 83/- a tihhniam a ni bawk. Petroleum and Oil Marketing company-te hian March thla khan commercial LPG gas man hi Rs. 350/-a tipungin, domestic LPG gas man hi Rs. 50/-in a lo tipung tawh bawk a ni.