Parliament special session koh a ni

Union Minister Pralhad Joshi chuan sorkar laipuiin September 8- 12 chhunga neih turin parliament special session a koh thu a sawi a, special session neih a nih chhan tur erawh tarlan a ni lo. Joshi chuan sitting vawi nga a awm dawn tih sawiin,'Amrit Kaal kal mek karah sawihona ṭha leh hlawk tak kan neih ngei theih ka beisei' tiin X-ah a post.

Sorkar laipui chuan special session-a sawiho tur agenda hi an tarlang rih lo a, Lok Sabha leh Rajya Sabha joint session a ni dawn em hriat a ni lo bawk. Bill pawimawh bik pass tur a awm hriat a nih bawk loh avangin Parliament building hlui aṭanga building thara insawnna atan, building hluia session ṭan a, building thara tihtawp tum nia ngaih a ni.

Eptu hruaitu lam erawh chuan Parliament special session neih tur hi an sawisel thung a, Maharashtra-a eptu party hruaitute chuan special session neih hun tur chu India rama hunpui pawimawh berte zinga mi Ganesh Chaturthi hman hun a nih tur thu leh, Delhi-a G20 summit neih lai a nih tur thute an sawi tel bawk.