Parliament special session-ah question hour awm dawn lo

Sorkar laipui chuan September 18-22 chhunga neih turin parliament special session a ko a, session-ah hian Lok Sabha leh Rajya Sabha-ah private member bill put luh a rem dawn loh bakah, question hour a awm dawn lo niin an sawi. Special session-ah hian ṭum nga ṭhut khawmna a awm ang a, hun ruat dan chu member-te a hrana hrilh leh an nih tur thu an sawi.

August 31 khan parliamentary affaris minister, Pralhad Joshi chuan Parliament special session koh a nih thu hi a puang a ni.

Parliamentary session hi kum khatah ṭum thum neih ṭhin a ni a, budget session, monsoon session leh winter session-ah te ṭhen hran a ni. Tun ṭuma special session neih tur hi kumin May 8-a prime minister Narendra Modi-a'n a hawn tak, Parliament building thara insawnna tur atana koh niin member tam tak chuan an ngai a, MP-te tana group photo lak tur tiha hun ruat a nih bawk avangin Parliament building thara insawnna tur a tichiang niin an ngai a ni. Hetih lai hian special session koh a nih hnu lawkah sorkar laipui chuan Lok Sabha leh state assembly tana a ruala inthlanna neih dan tur leh ngaihtuahtu tur panel din a nih dawn thu a puang chhunzawm a, hei vang hian tun Lok Sabha term chhunga special session neih hnuhnun ber tur a nih ring an awm phah bawk a ni.