Parliamentary panel-in tribal justice system hran neih rawt

Parliamentary standing committee chuan tribal justice system chu dan hran hlaka nei tura Parliament-a put luh a ṭul thu leh, state-te tana belh leh siam ṭhat ngai pawh zalenna zau tak neihtir a ṭul thu a sawi. He committee hian tribal pawl hrang hrang leh district council-a hmeichhia tam zawk an tel a ṭul thu a sawi bawk.

Parliamentary standing committee on 'Synergy between tribal justice system and regular justice system of the country' chuan Rajya Sabha-a department kaihhnawih thurel vawi 80 an neihnaah tribal justice system chungchang hi an ngaihtuah a; kum 2011 census en letin, tun dinhmunah ram chhungah tribal hi 1,04,281,034 an awm tih a sawi a, hei hi ram chhunga mihring awm zat aṭangin 8.61% a tling. Tribal justice system chu justice system pangngai nena a bul ṭhut aṭanga inkalh lo tura siam a ṭul thu an sawi a ni.

Committee chuan Department of Justice duh dan sawi chhawngin, tuna tribal justice system hman mek chu ṭhen dan mumal a awm loh thu leh tribal hrang hrangte tana a hran ṭheuha dan siam a nih thu an sawi a, hei hian rorelna kawngah harsatna tam tak a siam niin an ngai.

Panel committee chuan tribal society ṭhenkhatah hmeichhiate tan vantlang hmuna an tel leh kal ve phal lohna tam tak bakah, an bungraw chungah pawh thuneihna an neih lohna hmun tam tak a la awma an hriat thu an sawi. India constitution part IX hnuaia Panchayati Raj Institution inkaihhruaina tura duanin ruahmanna a siam angin mipa leh hmeichhe intluktlanna ram siam tura hmalak a ṭul thu an sawi bawk a ni.