INDIA-in committee member ruat belh

Eptu ṭangrual pawl, Indian National Developmental Inclusive Alliance (INDIA) chuan kar hmasa Ningani leh Zirtawpni khan Mumbai-ah meeting neiin, meeting-ah hian kum 2024 inthlanpui lo awm tura inbuatsaihna atan committee peng hrang hrang an din. Heng an committee din atana member an ruat bakah hian Inrinni khan committee-a tel tur member an ruat belh leh.

INDIA hian an pawl hmalakna tur ngaihtuah leh hmahruaitu atana an ruahman, member 14 awmna, coordination committee an din bakah, campaign committee, media buaipui tur working group leh social media enkawl hna thawk turte an din a, heng bakah hian committee dang pawh an la din bawk a ni.

Dravida Munnetra Kazhagam (DMK) hruaitu, Kanimozhi Karunanidhi leh Congress hruaitu Pawan Khera pawh media working group-a tel turin ruat belh an ni a, DMK mi Dayanidhi Maran leh RLD mi, Rohit Jakhad te chu social media committee member atan an ruat bawk. DMK aṭangin A. Raja chu working group for research-ah dah belh a ni a, DMK mi vek, Tiruchi Siva leh PDP mi, Mehboob Beg te chu campaign committee-a member 19 zingah ruat belh an ni ve leh bawk.