G20 summit atana venhim hna thawh dan tur duang

New Delhi-a September 9 -10 chhunga G20 summit neih tur atana venhimna hna thawk turin ruahmanna nasa tak siam niin, security mi leh sa 1,30,000 zet dah an ni.

Official-te chuan summit neih chhunga venhim hna thawk tur zingah hian Delhi police 80,000 an tel ang an ti a. Delhi police leh central force aṭangin mi 45,000 zette chu police form hak ṭhin pangngai ni loin form pawl an inbel dawn a ni. Heng mi 45,000 zingah hian eng emaw zat chu commando training chhuakte an ni bawk. Indian Air Force te chuan Delhi leh a chhehvelah hian van lama venhimna hna an thawk dawn a, summit neih chhung hian a khat tawkin an thlawk kual dawn a ni. Indian Air force bakah hian Indian military leh Delhi Police te leh paramilitary force ṭangkawp chuan anti-drone system an buaipui dawn niin an tarlang.

G20 summit chhung hian a ṭul huna che chhuak thei turin kang ṭhelhtu mi 400 ruat an ni bawk. Summit neih kar tawpah New Delhi border chu uluk taka ven a ni dawn a, khawpuia luh leh chhuah hi venhimna hnuaia kalpui a ni dawn bawk a ni. Summit neihna tur hmun, Pragati maiden chei ṭhatah hian security control room siam a ni dawn a, hotel tam tak chu venhimna khauh zawk siamsak an ni bawk. AI research firm pakhat, thlalak leh audio kim lo aṭanga information la chhuak thiam bik, Staqu chuan Delhi chhehvela CCTV camera zawng zawngah software install-in, hei hian misual hriat hranna kawngah a pui thei dawn a ni.

G20 summit-ah hian ram hrang hrang hruaitute an tel dawn a, US President Joe Biden, British PM, Rishi Sunak, Saudi Arabia aṭangin Mohammed Bin Salman te chu a langsar zual an ni. Japan, Australia, France leh Germany hruaitute tel thei tura beisei an ni a; United Nations hotu, International Monetary Fund, World Bank, World Trade Organisation leh World Health Organisation aṭang pawhin an hotute an tel dawn bawk.