Covid-19 kai dam tawh Nuai 15 chuang awm

India ramah hripui kai hmuh chhuah thar nasa takin pung mah se enkawl dam pawh an tam tawh hle. Nimina Ministry of Health and Family Welfare-in report a tihchhuahah chuan darkar 24 chhunga hri kai tawh dama puan mi 54, 859 awm lehin nimin thlenga hri kai dam leh tawh ram chhung hmun hrang hrangah mi 15,35,743 an awm tling tawh a, dam leh rate pawh sang chho zelin 69.33% a tling tawh a ni.

Hetih mek lai hian hri kai hmuh chhuah thar pawh an tam leh hle a, mi 62,064 chuan hri an kai tih hmuh chhuah thar leh niin hri kai mi 22,15,074 an awm tawh a, heng zinga mi 6,34,945 hian hri an la kai mek bawk. Darkar 24 chhungin mi 1,007 lai an thih leh avangin rampumah Covid-19 vanga thi mi 44,386 an awm tawh. Thihpui rate hi 2% a ni a, ni li chhung chu a zawnin hri kai hmuh chhuah thar sing ruk chuang an awm tawh a ni.

Indian Council of Medical Research (ICMR) chuan nimin khan sample 4,77,023 an endik leh tih sawiin hri len ṭan aṭanga nimin thleng khan Covid-19 sample 2,45,83,558 an enfiah tawh. India ramah hian ICMR pawmpui Covid-19 test-na laboratory 1,406 a awm tawh a, heng zinga 941 hi sorkar laboratory niin 465 chu private laboratory a ni ve bawk. 

US leh Brazil tih lohah chuan India ram hi hripui leng mekin a nghawng nat ber ram a la nih chhunzawm zel a, hetianga hmuh chhuah thar zat hi a pung zel a nih chuan Brazil aia dinhmun ṭha lo zawka a din thuai pawh a rinawm. 

Ningani liam ta aṭanga nimin thleng khan case thar nuai hnih chuang a awm a, case nuai 10 a awm aṭangin kar thum chauh a ral tihah nuai 20-ah a kai chho hman a ni. Maharashtra (12,248), Andhra Pradesh (10,820), Tamil Nadu (5,994), Karnataka (5,985), Uttar Pradesh (4,571), Bihar (4,157) leh West Bengal (2,939)-a case thar hmuh chhuah zat chu ram puma case hmuh chhuah thar aṭangin 75% a ni phak. 

Hri len ṭan aṭanga thihpui tawh ho zinga 72.16% hi Maharashtra, Tamil Nadu, Andhra Pradesh, Karnataka leh Delhi aṭangin a ni a, nimina postitivity rate chu  13.01% a ni bawk. State/UT zinga hriin a nghawng nat ber Maharsahtra-ah chuan hri kai mi 5,15,332 an awm tawh a, nimin khan hri kai hmuh chhuah thar 12,248  an awm leh a, mi 3,51,710 chuan dampui leh tawhin mi 1,45,865-in hri an la kai mek a, mi 17,757 an thi tawh bawk a ni.

Hri kai tam ber leh a dawttu state-ah hian case an in neih tam hleih hle a, hri kai tam ber dawttu state Tamil Nadu-ah chuan hri kai 2,96,901 an awm tawh a, heng zinga mi 2,38,638 chu an dam leh tawh thung. 

Government laboratory    : 941

Private laboratory    : 465

Real-Time RT PCR hmanna     : 715 (Govt: 429 + Private 286)

TrueNat hmanna : 580 (Govt    : 480 + Private: 100)

CBNAAT hmanna : 111 (Govt    : 32 + Private: 79)

Total No. of Labs     : 1406