G20 summit neih chhungin Delhi NCR-a office-te khar dawn

Delhi National Capital Region (NCR)-a sorkar leh private office hrang hrangte chu G20 summit chhung an chawl dawn a, in lam aṭanga hnathawh theih tura ruahmanna siam a ni dawn tiin Delhi sorkar chuan a puang. Bank leh sumdawnna hmun, bazar tiamin, summit neih hun ni thum chhung khar a ni dawn bawk a ni.

G20 summit neih tur avanga traffic tihdanglam nasa tak avangin, hnathawkte'n an office an panna lamah harsatna an tawk thei dawna hriat a nih avangin in lam aṭanga hnathawh hi kalpui tum a ni a, hei hian September 8-10 chhung a huam ang.

Sorkar thuchhuah avang hian company tam tak chuan an hnathawkte tan ruahmanna an siam ve nghal a; Noida-a awm, NIIT Lmited HR Hotu, Mita Brahma chuan,"Sorkar thuchhuah zulzuia G20 summit neih chhunga in lam aṭanga hnathawh phalna kan tichhuak tawh a ni. Delhi aṭanga hnathawka lo kalte leh Delhi-a kan hnuaia thawkte tan an awlsamna turin sorkar thuchhuah milin hriattirna kan chhuah tawh" tiin a sawi. Law firm INDUSLAW founding partner Gaurav Dani chuan an hnuaia thawkte in aṭanga hnathawh an phalsak thu sawiin, Gurugram-a an office erawh khar a nih dawn loh thu a sawi thung.

Summit neih tur avang hian Delhi-a mipui nunphung tidanglam thei ruahmanna hrang hrang siam a ni bawk. Delhi police-te chuan mipuite chu airport an kal dawn a nih chuan metro hmang mai tur leh New Delhi leh Old Delhi railway station-te hmang tam turin an hrilh. Police-te chuan mipuite chu airport, railway station leh bus terminal traffic chungchanga ruahmanna siam thar apiang an hriat zung zung theihna tur atan 'G20 virtual help desk' chu ngaihven reng turin an hrilh.

New Delhi-a nghah tur, G20 summit-ah hian ram hrang hrang 29 hruaitute an tel dawn a, European Union official bakah sawm bik ram ṭhenkhat aṭangin an tel bawk ang. Heng bakah hian international organisation 14 zet aṭangin palai an kal dawn bawk a ni.