G20 summit-ah Xi Jinping tel thei dawn lo

New Delhi-a G20 summit neih turah China president Xi Jinping a tel theih loh tur thu leh China aiawh hian premier Li Qiang zawk a tel dawn niin China Foreign Ministry thuchhuah chuan a tarlang. G20 summit hi September 9-10 chhungin neih a ni ang.

Tun hi G20 summit-a Xi Jinping a tel loh tur ṭum khatna a ni. Xi bakah hian Russia president Vladimir Putin leh Mexico president Andres Manuel Lopez Obrador te chuan G20 summit an tel theih loh tur thu hi an sawi tawh bawk a ni.

G20 summit-a President Xi tel theih loh tur thu sawi a nih hnu lawkah hian September 7-a lo kal tur, US president Joe Biden chuan pawi a tih thu a sawi a, mahse, President Xi chu a hmuh tho tur thu a sawi thung a ni. Hetih lai hian special secretary for G20, Muktesh Pardeshi chuan President Xi kal theih dawn leh dawn loh chungchangah chuan ziaka thu chiang zawk an la nghah thu a sawi a,"Chanchinbu leh thuchhuah kaltlangin a lo kal theih loh tur thu hi chu kan hre tawh a, mahse, ziak ngeia thil kalpui ṭhin kan nih avangin ziak ngeia min rawn hrilh hun kan la nghak a ni. Ziaka a lo tel theih loh tur thu min hrilh hma chuan engmah ka sawi chiang thei lo," tiin press mite a hrilh.

India President-na hnuaia G20 summit, Delhi-a neih turah hian ram hrang hrang 29 aṭangin ram hruaitute an tel dawn a, ram hruaitu lu ber ni loa an aiawh dang intir tur pawh eng emaw zat an awm bawk a ni. Kum 2010 hnu lam aṭang khan khawvel huapa ram hruaitute intawh khawmnaah ram hruaitu lu berte kim ṭhapa an telna a awm leh tawh lo a ni. Canada, Germany, Italy, India, South Korea, UK, US leh European Union te chauh hi G20 summit-a ram hruaitu lu ber la tel kim zat zat te an ni.